Friday, 1 September 2017
MKUU wa wilaya ya Bunda Lydia Bupilipili,
amemuagiza mkuu wa polisi (OCD) wilayani humo kumkamata na kumuhoji katibu wa
mbunge wa jimbo la Bunda mjini Yohana Kahunya, kwa kile alichodai kuwa ni
kumkashifu kwa kupitia mitandao ya kijamii, ili ikithibitika afikishwe
mahakamani.
 |
| wa wilaya ya Bunda Lydia Bupilipili |
Mkuu huyo wa wilaya ya Bunda alitoa agizo hilo
juzi ofisini kwake wakati akizungumza na waandishi wa habari, kuhusu masuala mbalimbali
ya kimaendeleo wilayani hapa.
Bupilipili alisema kuwa katibu wa mbunge
Esther Bulaya, hivi karibuni ameendelea kumshambulia kwa kumchafua
kupitia mitandao ya kijamii.
Alisema kuwa kwa jinsi hiyo ameamua kuchukua
hatua ya kumwagiza mkuu wa jeshi la polisi katika Wilaya hiyo, kumkamata na
kumhoji na kwamba iwapo ikithibitika afikishwe mahakamani kwa kosa la mtandao.
“Amenichafua sana kwenye mitandao ya kijamii
hivyo ninamwagiza OCD, amkamte katibu huyo na ahojiwe na iwapo ikithibitika
afikishwe mahakamani kujibu tuhuma hiyo kwa kushitakiwa kwa kosa la mtandao
maana sheria tayari ipo inayokataza matumizi mabaya ya mitandao ya kijamii”
alisema.
Pia, alisema kuwa katibu huyo ahojiwe na
polisi kuhusu kauli zake ambazo amekuwa akizitoa kwamba mawasiliano yake na
polisi wilayani hapa, eti mbunge Bulaya pamoja na katibu huyo wamekuwa
wakiyapata kwa haraka na mapema sana.
“Polisi wamhoji aseme taarifa hizo amekuwa
akizipata wapi, na wao polisi wajitathmini kama wao ndio wanaotoa siri za serikali
wakiwa watumishi wa umma na kama ikithibitika ni uongo achukuliwe hatua”
alissistiza.
Na katika hatua nyingine Bupilipili, alitumia
fursa hiyo kuwapongeza wananchi wote, kwa kushiriki kikamilifu katika mbio za
mwenge wa uhuru uliokimbizwa wilayani hapa hivi karibuni na kusema kuwa
wameutendea haki hali ambayo imeonyesha umoja na mshikamano.
Alisema kuwa mwakani pia wananchi wa wilaya
hiyo wajitokeze kwa wingi na kuutendea haki mbenge wa uhuru, kwa kushiriki
kikamilifu maana ukimbizwa ili kueneza ujumbe mahususi na maalumu kwa wananchi
wote bila kujali itikadi za vyama vya siasa, wala dini au kabila
Alisema kuwa hali hiyo ni ya kizalendo nay a
kumuenzi baba wa taifa mwalimu Julius Nyerere ambaye ndiye mwasisi wake.
