Sunday, 19 November 2017
MKUU
wa Mkoa wa Simiyu, Anthony Mtaka
ameiomba Benki ya Maendeleo ya Kilimo Tanzania (TADB) kuuwezesha mkoa wa Simiyu
katika kufanya mapinduzi ya Kilimo kupitia miradi ya kimkakati inayotekelezwa
mkoani humo.
 |
| Mkuu wa wilaya ya Busega, Tano Seif Mwera (kulia) akiwakaribisha wageni kutoka Benki ya Maendeleo ya Kilimo Tanzania waliofika kijijini Mwamanyili kujionea chanzo cha maji na eneo litakalotumika kwa ajili ya kilimo cha umwagiliaji. Wageni hao waliongozwa na Mwenyekiti wa Bodi ya Wakurugenzi ya Benki hiyo, Rosebud Kurwijila (kushoto). |
Mtaka amesema mkoa wa Simiyu umejipanga kutumia fursa za mikopo nafuu
inayotolewa na TADB ili kuunga mkono juhudi za serikali za kuhakikisha wakulima
wanalima kisasa ili kuleta mapinduzi ya kilimo nchini.
Mtaka aliongeza kuwa Mkoa wa Simiyu uko tayari kufanya kazi na Benki ya Kilimo
kupitia vikundi vya uzalishaji, Halmashauri na Miradi mbalimbali inayotekelezwa
mkoani humo.
Akaongeza kuwa hivi
karibuni Mabaraza ya Madiwani katika Halmashauri ya Wilaya ya Busega na Meatu
Mkoani Simiyu yaliridhia Halmashauri hizo kukopa jumla ya shilingi bilioni 17.1
kutoka TADB kwa ajili ya kutekeleza Miradi mikubwa miwili ya Maendeleo.
 |
| Mhandisi wa Halmashauri ya Wilaya ya Busega, Eng. Tumbu akitoa maelekezo kwa ugeni kutoka TADB juu ya chanzo cha maji cha maji kitakachotumika katika mradi wa umwagiliaji wa Mwamanyili. |
Aliitaja miradi hiyo
kuwa ni mradi wa Kilimo cha Umwagiliaji katika Bonde la Mwamanyili ulio chini
ya Halmashauri ya Wilaya ya Busega ambao utekelezaji wake umepanga kukopa
shilingi bilioni 10.7 na mradi wa upanuzi wa Kiwanda cha Maziwa cha Meatu ulio
chini ya Halmashauri ya Meatu unaohitaji shilingi bilioni 6.4.
“Tungehitaji
kuwa Mkoa ambao kupitia Benki ya Maendeleo ya Kilimo tungetengeneza namna
ambayo ingewasaidia wakulima na ikasaidia mikoa mingine kuja kuona maendeleo ya
kilimo ambayo ni matokeo ya Serikali
kuwekeza katika Benki ya Kilimo” amesema Mtaka.
"Sisi
kama Mkoa tumejipanga, tumetoa elimu ya utayari na
namna ya utekelezaji wa shughuli zote kwa wataalam wetu pamoja na wananchi na isitoshe tayari tumeshafanya utafiti na kuandaa mwongozo wa uwekezaji ndani ya mkoa, hivyo tunawakaribisha kuwekeza,” aliongeza.
namna ya utekelezaji wa shughuli zote kwa wataalam wetu pamoja na wananchi na isitoshe tayari tumeshafanya utafiti na kuandaa mwongozo wa uwekezaji ndani ya mkoa, hivyo tunawakaribisha kuwekeza,” aliongeza.
Aidha, Mtaka ameongeza kuwa Mkoa wa Simiyu unatekeleza Sera ya Uchumi wa Viwanda
chini ya Kauli Mbiu ya “Wilaya Moja Bidhaa Moja Kiwanda Kimoja” ambapo
hadi sasa kuna kiwanda cha chaki na maziwa na miradi mingine minne ya viwanda
iko katika upembuzi yakinifu.
“Hivyo Benki ya
Kilimo inaweza kuwekeza katika miradi hii kwa kuwawezesha wakulima na wafugaji
kuzalisha malighafi ya Viwanda hivyo au kuwa mdau katika viwanda hivyo,”
aliomba.
Kwa
upande, Mwenyekiti wa
Bodi ya Wakurugenzi wa Benki hiyo, Rosebud Kurwijila alisema kuwa Benki ya
Kilimo imejizatiti katika kuchangia kwa kiasi kikubwa katika kuleta Mapinduzi yenye tija katika Sekta ya
Kilimo kwa wakulima wa Tanzania ili kusaidia upatikanaji wa fedha na sera nzuri
zitakazosaidia maendeleo ya kilimo nchini.
Bibi Kurwijila alisema kuwa katika kutekeleza mkakati wa kuwafikia wakulima wengi
zaidi nchini TADB imejipanga kutoa huduma kupitia kongani mpya nane (8) ili
kuongeza tija kwa wakulima nchini.
Alizitaja Kongani hizo kuwa ni pamoja na Kanda ya
Kati, Kanda ya Ziwa, Kanda ya Kaskazini na Kanda ya Mashariki. Nyingine ni
Kanda ya Magharibi, Kanda ya Nyanda za Juu Kusini, Kanda ya Kusini na Zanzibar.
“Kongani ni njia ya kimkakati ya kijiografia yenye
kujikita katika shughuli za kilimo zinazohusiana, wasambazaji, na taasisi
zinazohusishwa katika kujenga usawa wa moja kwa moja miongoni mwa wadau, hivyo
ili kukidhi mahitaji ya wakulima nchini, benki ya kilimo itawafikia kupitia
njia hii,” alisema.
Naye
Mkurugenzi wa Biashara na Mikopo wa TADB Augustino Matutu Chacha amesema
wamefurahishwa na utayari wa Mkoa wa Simiyu
juu ya kuwawezesha wakulima na Benki hiyo iko tayari kutoa mikopo pia kwa wakulima
wa zao la pamba ambao wanazalisha zaidi ya asilimia 60 ya pamba yote nchini ili
izalishwe kwa wingi zaidi na katika ubora wa hali ya juu.
Amesema wataalam wa kilimo wa Mkoa wa Simiyu kwa kushirikiana na wataalam wa benki ya Maendeleo ya
kilimo Tanzania (TADB) watakutana ili kuona namna watakavyofanya kazi kwa
pamoja ili mikopo itakayotolewa iweze kuwa wa manufaa kwa wakulima na nchi kwa
ujumla.
Aidha
amewaeleza Wakurugenzi wa Halmashauri zote kuwa, Halmashauri zinaweza kupatiwa
mikopo ili ziweze kuendesha miradi ya kilimo itakayoweza kuwa vyanzo vipya vya mapato kwa Halmashauri zao.
